Испания Бош вазири Педро Санчес «Ғазодаги қирғинни тўхтатиш учун «Исроил»га босим ўтказиш»га чақирди ва Мадрид БМТнинг Халқаро суддан «Исроил»нинг уруш олиб бориш усуллари бўйича қарор чиқаришни талаб қилувчи резолюциясини қабул қилишни режалаштираётганини билдирди.
«Испания бу ваҳшийликка чек қўйиш учун қўлидан келган барча ишни қилади. Испания ва Фаластин БМТ Бош Ассамблеясида янги резолюция лойиҳасини илгари сурмоқда. Биз «Исроил»дан Ғазонинг гуманитар блокадасини тўхтатишни ва гуманитар ёрдамга тўлиқ ва тўсиқларсиз кириш имкониятини беришни талаб қиламиз», - деди Испания Бош вазири.
Санчес Бағдодда бўлиб ўтган Араб давлатлари лигаси саммитида жаҳон етакчилари «айниқса халқаро ҳуқуқ томонидан бизга тақдим этилган каналлар орқали Ғазодаги қирғинни тўхтатиш учун «Исроил»га босимни кучайтиришлари» кераклигини айтди. «Фаластин кўз ўнгимизда қонга ботмоқда», - деди Санчес ва БМТ Бош Ассамблеясига иккита таклиф киритишга ваъда берди: Халқаро суднинг «Исроил» оккупация қилинган ҳудудлардаги ўз мажбуриятларига риоя қилаётганлиги тўғрисида қарор чиқариш ва Ғазодаги «Исроил»нинг халқаро жавобгарлиги тўғрисида қарор чиқариш. Чоршанба куни эрталаб Испания Бош вазири Педро Санчес биринчи марта «Исроил»ни «геноцид давлати» деб атаган эди.
Шу билан бирга, Иброҳим келишувлари қайтиш ҳуқуқини бекор қилиш орқали Фаластин ишига нуқта қўйишга қаратилган бўлса-да, БАА ташқи ишлар вазири Абдулла бин Заид уларни Ғазо учун қутқарув доираси сифатида оқлашга уриниб, ёрдам кўрсатишдаги ролини мақтади.
Яқинда берган интервьюсида у «Исроил» геноцидини тўхтатишдан кўра исроиллик асирларни озод қилишга устунлик берди ва бир томонлама тинчликка, қаршиликни йўқ қилишга ва «Исроил» Ғазодаги геноцидини тўхтатганидан кейин янги ҳокимият ўрнатишга чақирди. У фаластинлик маҳбуслар ёки уларнинг ҳуқуқлари ҳақида ҳеч нарса айтмади.
БАА 2020 йилги Иброҳим келишувларига мувофиқ Баҳрайн ва Марокашдан кейин «Исроил» билан муносабатларни нормаллаштирган учинчи араб давлати бўлди ва оккупацияга қарши туриш ўрнига уни таъминлашдаги ролини мустаҳкамлади. Судан ҳам «Исроил» билан муносабатларни нормаллаштириш жараёнини бошлади, бироқ у якунланмай қолди...
Абу Муслим тайёрлади
